.png "Menu")
किताबी संसारमा हराएकी हुन्छु
मुना बर्तौला, विद्यार्थी
रसायनशास्त्रमा स्नातक गर्दै गरेकी मुना बर्तौला अध्ययनसँगसँगै फोटोग्राफीमा पनि उत्तिकै चासो राख्छिन् । उनी जहिल्यै नूतन ठाउँ घुम्न र प्राकृतिक दृश्यलाई आफ्नो क्यामेरामा कैद गर्न लालायित हुन्छिन् । आफ्नो सौखिन छविप्रति दह्ग पर्दै उनी भन्छिन्, Èघुम्न जाने निर्णय हुनासाथ कतिखेर बस–स्टेन्ड पुग्नु हुन्छ ।É उनी आफूलाई पुस्तकले नै कल्पनाशील बनाएको र सधैं किताबी–संसारमा हराइरहने बताउँछिन् । उनीसितको भेटमा भएको किताबी गफ:
अहिले के पढ्दै हुनुहुन्छ ?
- आजकल म फिदोर दोस्तोएभेस्कीको ‘क्राइम एन्ड पनिस्मेन्ट’ पढिरहेको छु । दोस्तोएभेस्कीको मनोविश्लेषणात्मक लेखनीले मलाई तानिरहेको छ ।
यसपछि कुन किताब पढ्ने सोच छ ?
- यसपछि दुई कृतिप्रति मेरो नजर परेको छ । चिमामान्डा नोग्जी एडिचीको ‘अमेरिकानाह’ र रामेश कोइरालाको ‘कोपिला आश्रम’ । सायद यही पढ्छु ।
तपाईको मनपर्ने विधा ?
- प्रायः फिक्सन मनपर्छ । यद्यपि अध्ययनलाई फराकिलो बनाउन विषय र सन्दर्भ अनुसार नन–फिक्सन पनि पढ्न रुचाउँछु ।
एकदमै मनपरेका सात किताबको नाम लिनुपर्दा ?
- पारिजातको शिरीषको फूल, जोस्टिन गार्डनरको सोफिज वल्र्ड, बुद्धिसागरको कर्नाली ब्लुज, अरुणन्धती रोयको गड अफ् स्मल थिङ्स, खालेद हुसेनीको काइट रनर, हा जिनको वेटिङ, लियो टोल्सटोयको अन्ना कारेनिना रहेका छन् ।
कुन किताब पढ्दा तपाई निरास हुनुभयो ?
- चेतन भगतको रिभोलुसन ट्वान्टी–ट्वान्टी, पाउल्हो कोहेल्होको दी एल्फ र मारियो बारगास, ल्होसाको ब्याड गर्लले मलाई निरास बनायो । बेकारमा पढेछु जस्तो लाग्यो ।
कहाँबाट किताब प्राप्त गर्नुहुुन्छ ?
- आजकल पठन संस्कृतिको विकास भइरहेको छ । पढ्ने चाहना मात्र राख्नुपर्छ किताबको चिन्ता गर्नुपर्दैन । साथीहरुबाट पनि साटफेर गरेर पढिन्छ । अचेल त इबुक्सको जमाना छ । एकै क्लिकमा किताब तपाईको कम्प्युटरमा आउँछ ।
महिनामा औसत कति रकम खर्च गर्नुहुन्छ ?
- ठिक्क खर्च गर्छु । विद्यार्थी भएकोले मनग्य खर्च गर्न के सकिन्थ्यो र ? चलेका नेपाली लेखकका किताबहरु किन्न कन्जुस्याइँ गर्दिन् । पढ्नै पर्ने किताब जसरी नि पढिन्छ । इबुक्सले मेरो किताबी इच्छा पूरा गर्छ ।
केमा बसेर पढ्न रुचाउनुहुन्छ ?
- फुर्सद हुनुप¥यो अनि किताब हुनुप¥यो । जहाँ पनि सुरु गरिहाल्छु । कतिपय बेला लामो यात्रामा बसमै पनि पढिरहेको हुन्छु । पढाइको आसन बताउनु पर्दा बेडमा ढल्किएर पढ्छु ।
तपाईलाई मन परेका सिनेमा ?
- सिनेमा हेर्न रुचाउँछु । द वे ब्याक, जब वी मेट र हालसालै हेरेको क्विन हाइवे तथा ब्लु जास्मिन एकदमै मनपरेका सिनेमा हुन् ।
कलेजका युवापुस्ताले पढ्नैपर्ने किताब ?
- आफ्नो अस्तित्वको पहिचान गर्न पारिजातका सम्पूर्ण कृति । नारायण वाग्लेको पल्पसा क्याफे । खालेद हुसैनीको काइट रनर, एन्ड द माउन्टेन्स इकोड र थाउजेन्ड स्प्लेन्डिड सन्स अनि देवकोटाको मुनामदन ।
पढ्न कस्तो वातावरण चाहिन्छ ?
- एकदम एकान्त । पढुन्जेल कसैले आवाज नै ननिकालोस् जस्तो लाग्छ । किताबी संसारमा हराएको हुन्छु ।
पढ्ने बानी कसरी लाग्यो ?
- घरमा पढन्ते वातावरण छ । सबै जना पढ्न मन पराउनुहुन्छ र पढ्नुपर्छ बनिरहनुहुन्छ । सानैदेखि बाबाले किताब ल्याइदिने गर्नुहुन्थ्यो । उहाँले किताब पढ्न दिने र पढिसकेपछि सोध्ने गर्नुहुन्थ्यो । बाबाले सोध्नुहुन्छ भनेर पढ्ने गर्थे । तर, बिस्तारै बानी लाग्यो, नपढी बस्न नसक्ने भएँ ।
0 comments: