.png "Menu")
शब्दचित्रमा मिस्टर बिन
हाँस्यकलाकार तथा पटकथा लेखक रोवन सेबास्टीयन
आटकिन्सन उर्फ मिस्टर बिन (पात्रले जुराइदिएको नाम) को जन्म सन् १९५५ जनवरी ६
तारिखमा इङल्यान्डमा भयो । अहिले ५८ वर्षमा हिँड्दै गरेका उनी किसान परिवारमा जन्मिएका थिए । मिस्टर बिनले
बेलायती पूर्व प्रधानमन्त्री टोनी ब्लेयर पढेको प्राथमिक विद्यालयमा आफ्नो शिक्षा
आरम्भ गरे । पछि न्यूक्यासल युर्निर्भसिटीमा इलेक्ट्रीकल इन्जिनियर पढ्नका लागि
पठाइए । अन्त्यमा अक्सफोर्ड युनिर्भसिटीबाट स्नात्तकोत्तर सिध्याए । अक्सफोर्ड
पढ्दाताकै उनको कला यात्रा सुरु भयो, जसका फिल्म, टेलिफिल्म, रेडियो कार्यक्रमहरू सुन्दै÷हेर्दै हामी पेट मिचिमिची हाँस्छौँ अथवा हाँसेर डल्लो पर्न बाध्य
पारिन्छौँ ।
अध्ययनरत अवस्थामै उनी अक्सफोर्ड युनिर्भसिटी
ड्रामाटिक सोसाइटी र दी इक्सपेरिमेन्टल थिएटर क्लबमा जोडिए, जहाँ उनले हास्यजगत्को भीमकाय जीवलाई समात्न पुगे । प्राविधिक विषय
पढेका उनी ग्राजुएसनपछि आफ्नो ऐच्छिक क्षेत्रमा लाग्नुको साटो उनी हास्यकलाकार
एन्गस डेइटनसित जोडि बाँधिए, भ्रमण गर्न थाले । क्रमशः
उनीहरूका प्रहसन टेलिभिजनका लागि फिल्मकृत गरियो । विस्तारै उनीहरू आफ्नै देशमा
चिनिन थाले । मानिसहरू उनका प्रहसन हेर्न लालायित हुन थाले । उनीहरूको ‘नट द नाइन ओ’क्लक न्यूज’ अन्ततः सर्वाधिक चर्चित भयो । त्यसपछि मिस्टर बिन यूकेमा सेलिबे्रटीमा
दरिए ।
त्यसपछि उनी आधा घन्टाको टेलिफिल्म ‘मिस्टर बिन’मा देखा परे । यो टेलिफिल्मले
उनको सफलताको रेखालाई अझ तन्काइदियो । स्वदेशी तथा विदेशी टेलिभिजनहरूमा ती
शृङ्खलाहरू प्रसारण गरिए । यसप्रकारको सनसनीपूर्ण मिस्टर बिनको मागले ठूलो पर्दाका
हिट फिल्महरू दिए– फन्डामेन्टल फ्रोलिक्ज्, द सिक्रेट पलिसम्यान्ज् अदर बल, डेड अन टायम, नेभर सेइ नेभर अगेन, दी अपोइमेन्टज् अभ् डेनिस
जेनिङ्गस्, द टल गाइ, द वीचेज्, द ड्राइभर म्यान, हट सट्ज् पार्ट ड्यूक्स, फोर वेडिङ एन्ड फ्युनरल, बिन, मेइबी बेबी, र्याट रेस, स्कोबी डू, जोन्नी इङलिस, एक्चोअली, किपिङ मम, मिस्टर बिन्ज् होलिडेई, जोनी इङ्लिस रिबन । सन् १९८० को दशकमा मिस्टर बिनले सुनेत्रा
शास्त्रीलाई भेट्टाए, उनी बिबिसीकी मेकअप
आर्टिस्टमा कार्यरत थिइन् । शास्त्री भारतीय बुबा र बेलायती आमाकी छोरी थिइन् । यी
दुई जोडी सन् १९९० फ्रेब्रुअरी ५ तारिखका दिन विवाह बन्धनमा बाँधिए । उनीहरूका दुई
छोराछोरी पनि रहेका छन् ।
मिस्टर बिनको हास्य अभिनय प्रायः बाहिरी हाउभाउमा
आधारित हुन्छन्् । उनका फिल्महरूमा संवादहरू त्यति हुँदैनन् । उनी हास्य हाउभाउकै
माध्यमबाट दर्शक हँसाउन माहिर छन् । यसै खुबीका कारण रङ्गमञ्चमा
उनलाई ‘रबरको अनुहार भएको मान्छे’ भन्ने उपमा दिइएको छ ।
मिस्टर बिनका धेरै किस्साहरू सुन्न पाइन्छन् ।
मिस्टर बिन सन् २००५ मा राजकुमार चाल्र्सको विवाहमा पाहुना भएर गएका थिए । मिस्टर
बिनकी छोरी लिलीले मिस्टर बिन्ज होलिडेईमा अभिनय गरेकी थिइन् । मिस्टर बिनको टाउको
टर्कीमा फसेको थियो, जुन अत्यधिक हास्यात्मक दृश्य
बनेको थियो ।
यता, पात्रको नामलै चिनिएका मिस्टर
बिन अब सो पात्रबाट सन्यास लिँदैछन् । हालै उनले डेली टेलिग्राफमार्फत् यस्तो
घोषणा गरेका छन्, ‘मेरो लागि मिस्टर बिन पात्र
व्यापारिक रूपमा छिमल रह्यो । विशेषगरी
गतिलो हाउभाउ र बचपना देखाउन । मलाई अब धेरै गर्नु आवश्यक लाग्दैन । जब शरीरको
क्षमताले निषेध गर्न थाल्छ । म यसो सोच्न थाल्छु, पात्रको पचासौँ वर्षमा
बच्चाजस्तै हुनु, दुःखलाग्दो हुनसक्छ ।’
उमेरको यतो बढ्दो सिलसिला सँगै अब मिस्टर बिन कसरी
प्रस्तुत हुने हुन् ? हेर्दै जाम्, हाँस्तै जाम् !
0 comments: